Ne lava foki ‘a e fa’u maau faka-Tonga ‘a e fanau ‘i he konga ‘o e teuteu ki he uike lea faka-Tonga. Pea ko e ni’ihi eni ‘o e ngaahi maau.
Sutton Park School
Ko e ‘apiako ko Sutton Paaka
‘Oku makehe pea ‘ilonga
He ‘oku tokangaekina e me’a kotoa
Ako faka’atamai, sipoti moe ‘ulungaanga.
Si’i kau faiako moe ‘aufuatoo
Fai honau fatongia ‘i he mafana mo e momoko
Ni’ihi toki matuku kuo hoko e ono
Taumu’a ke ta lava ‘o ‘oua ‘e too.
Monu’ia ha taha ‘oku lototoo
Talangofua, taliangi pea fanongo
Tukuingata ‘oku fakahoko
He tenau ma’u e pale koe poto.
‘Ulungaanga
Ko e mahu’inga ‘oe ‘ulungaanga
‘Oku ‘ikai sola kiai ha taha
Fakafiefia pea fakalata
He ‘oku tala ai ‘eta matu’a
‘Ulungaanga maau mo ‘ikai makaka
Fakahoko pe ‘e he taha ne ‘olunga he kali loa
Ma’opo’opo e me’a lelei kotoa
Faka’amu ia ‘a e si’i ngaahi fa’ee ‘ofa.
KO KITAUA MO ‘ETA AKO
Ko kitaua koe tofi’a mei langi
Ke tokangaekina, tauhi mo fakalekesi
Ka tonu pea ‘oku hoko koe tapuaki
ki he famili fonua pea moe siasi.
Ka ‘i ai ha taimi ‘oku ta lotosi’i
Faka’amu keta va’inga mo maumautaimi
Ki’i malolo si’i ‘o fakakaukau ki ‘api
Pe ko e haa nai ha me’a keta ‘ofa ‘aki
Manatu ki ‘api ‘oku fakamamahi
‘apongipongi pea moe kalusefai lahi
Si’i ngaahi fa’ee moe ngaahi tamai
Ko e faka’amu ke ‘i ai ha’ata ‘amanaki.
Monu’ia ha fanau ‘oku manatu ki ‘api
He ‘oku nau tukuingata ‘o ‘ikai toe tuku ha ivi
ako fai fika, laukonga pea moe tohi
taumu’a ke ikuna ‘o ‘ikai ha holomui.
KO HOKU LAUKAU’ANGA
Tuku keu fakatulou atu ki he matanga
Pea ki he tu’unga kotoa ‘oku fa’a fakatapua
Tuku ke ngofua pea tuku ke ‘ataa
Keu lave atu koe finemotu’a tu’a
Ko Tonga ‘a hoku laukau’anga
He kau ka lea ‘oku mahino hono ‘uhinga
Pea kauka laka ‘oku faka’apa’apa hoku teunga
Toki lava pe ha taha ‘ofa fonua
Teu ngata aa he kau foki aa ki he loki tahataha
fai mai e tali fatongia
Tauange keta kei kafataha
Pukepuke ‘a fufula hota laukau’anga.
‘Ulungāanga Faka‘apa‘apa
Ko ‘eta Tongá ‘i hota ‘ulungāanga faka‘apa‘apá
‘I he‘eta leá mo e tō‘onga mo‘ui kotoá
Faka‘aki‘akimui, lototō mo e mamahi‘i me‘á
Ko hota tupu‘angá ko ia hota talá
‘Oua ‘e ma‘u ha koloa pea ngalo e ki mu‘á
Toka‘i e kau takí ,ma‘ulaló mo e ma‘olungá
Pea ‘ofa ki he masivá he ‘oku fakafolofolá.
Ko e teunga fakafonuá hangē ko e ta‘ovalá
‘Ilo‘i kitaua ‘i Tongá mo tu‘apule‘angá
Fungani‘aki ‘eta leá ke tala hota Tongá
Ko ia hota faka‘ilonga mahu‘inga tahá
Lea tulou ‘o ka ke laka ‘i ha tahá
Pea fakamālō ‘i ha‘o ma‘u ha me‘á
Ka ui ha taha ko au eni,‘oua ‘e ko e hā.
HALA VAINE
Tau ‘eva ange ki he hala Vaine
‘O mamata hono ngaahi masaní
Falemaa Tonga, dairy moe falekai
Lato ai ‘eta fiema’u hota famili
Ko hai ‘e lau ki hono ‘atakai
Lahi ai e kakai mei hota matakali
faingofua pea fai e femahino’aki
fe’uga ki he malohi mo e vaivai
Hei’ilo koe pea mo ha’o fili
Ki ha feitu’u teke lata ai
Ka ‘oku ou kei mateaki’i
Hala Vaine fe’unga pea mo hota ivi.
